تروح الكراكون ولا تروح فى طوكر؟؟
كلمة "كراكون" هي تحريف لكلمة ظهرت فى عهد "محمد علي باشا" لوصف قسم البوليس. الكلمة الأساسية اللي كانت مستخدمة هي "قره قول" و بعدين اتحرفت و بقت "كراكون". كلمة "قرة قول" أساسًا كلمة تركية من جزئين: الجزء الأول "قرة" بمعنى اللون الإسود و الجزء الثاني "قول" اللي كانت معناها المركز اللي فيه طابور من الجنود. و بكده المعنى الحرفي "لقرة قول" كان المركز اللي فيه طابور من الجنود اللي لابسين إسود.
و على فكرة "كراكون" ماكانتش الكلمة الوحيدة اللي استخدمت لوصف قسم البوليس. كان في كلمة تانية. الكلمة دي هي "تمن" و بيرجع استخدامها عشان وقت "محمد على باشا" كانت القاهرة متقسمة ل٨ أقسام و كل قسم كان فيه مركز بوليس. فيعتبر ان كل قسم بوليس من ال٨ كأنه "تمن" من العدد الكلي من الاقسام.
لما جيه بقى الخديوي إسماعيل ماكانش بيودي الناس للتمن بس.لا ده كمان كان بيوديهم "لطوكر". طوكر دي كانت مدينة فى السودان و كانت المكان اللي لما حد بيتنفى بيتبعت عليه على طول. وارد يرضى عنه الخديوي و يرجعه و وارد ميرجعهوش. بس غالبًا كانت سكة طوكر سكة اللي بيروح ما بيرجعش. و من هنا جيه مصطلح "هاوديك فى طوكر". كنوع من أنواع التهديد و الوعيد.
